ਉੱਤਰੀ ਕੋਰੀਆ ਨੇ ਦਾਗੀਆਂ ਦੋ ਮਿਜ਼ਾਈਲਾਂ

ਸਿਓਲ -ਅੰਤਰਰਾਸ਼ਟਰੀ ਪੱਧਰ ਤੇ ਚਿਤਾਵਨੀ ਦੇ ਬਾਵਜੂਦ ਉੱਤਰੀ ਕੋਰੀਆ ਨੇ ਅੱਜ ਛੋਟੀ ਰੇਂਜ ਦੀਆਂ ਦੋ ਮਿਜ਼ਾਈਲਾਂ ਸਮੁੰਦਰ ਵਿੱਚ ਦਾਗੀਆਂ| ਦੱਖਣੀ ਕੋਰੀਆ ਦੇ ਅਧਿਕਾਰੀਆਂ ਦੇ ਹਵਾਲੇ ਨਾਲ ਦੱਸਿਆ ਗਿਆ ਕਿ ਉੱਤਰੀ ਕੋਰੀਆ ਨੇ ਦੋ ਮਹੀਨੇ ਤੋਂ ਵੀ ਜ਼ਿਆਦਾ ਸਮੇਂ ਦੇ ਬਾਅਦ ਕੋਈ ਹਥਿਆਰ ਲਾਂਚ ਕੀਤਾ ਹੈ| ਮਿਜ਼ਾਈਆਂ ਅਜਿਹੇ ਸਮੇਂ ਵਿਚ ਦਾਗੀਆਂ ਗਈਆਂ ਹਨ ਜਦੋਂ ਉੱਤਰੀ ਕੋਰੀਆ ਅਤੇ ਅਮਰੀਕੀ ਅਧਿਕਾਰੀ ਮੁੜ ਪਰਮਾਣੂ ਹਥਿਆਰਾਂ ਤੇ ਵਾਰਤਾ ਸ਼ੁਰੂ ਕਰਨ ਵਾਲੇ ਹਨ|ਦੱਖਣੀ ਕੋਰੀਆ ਦੇ ਜੁਆਇੰਟ ਚੀਫਸ ਆਫ ਸਟਾਫ ਨੇ ਕਿਹਾ ਕਿ ਮਿਜ਼ਾਈਲਾਂ ਦੇਸ਼ ਦੇ ਈਸਟਰਨ ਕੋਸਟਲ ਟਾਊਨ ਵੋਨਸਾਨ ਤੋਂ ਦਾਗੀਆਂ ਗਈਆਂ ਅਤੇ ਕਰੀਬ 430 ਕਿਲੋਮੀਟਰ ਦੀ ਦੂਰੀ ਤੈਅ ਕਰਨ ਦੇ ਬਾਅਦ ਸਮੁੰਦਰ ਵਿਚ ਡਿੱਗ ਗਈਆਂ| ਦੱਖਣੀ ਕੋਰੀਆ ਦੇ ਸੁਰੱਖਿਆ ਅਫਸਰਾਂ ਮੁਤਾਬਕ ਅਮਰੀਕਾ ਨੇ ਅੰਦਾਜ਼ਾ ਲਗਾਇਆ ਹੈ ਕਿ ਇਕ ਮਿਜ਼ਾਈਲ ਦੀ ਰੇਂਜ 430 ਕਿਲੋਮੀਟਰ ਤੋਂ ਜ਼ਿਆਦਾ ਸੀ| ਉਕਤ ਅਧਿਕਾਰੀ ਨੇ ਆਪਣੀ ਪਛਾਣ ਗੁਪਤ ਰੱਖਣ ਦੀ ਸ਼ਰਤ ਤੇ ਇਹ ਜਾਣਕਾਰੀ ਦਿੱਤੀ| ਅਧਿਕਾਰੀ ਮੁਤਾਬਕ ਸ਼ੁਰੂ ਵਿੱਚ ਇਕ ਰੱਖਿਆ ਅਫਸਰ ਨੇ ਅੰਦਾਜਾ ਲਗਾਇਆ ਸੀ ਕਿ ਦੋਵੇਂ ਮਿਜ਼ਾਈਲਾਂ ਲਾਂਚਰਸ ਤੋਂ ਫਾਇਰ ਕੀਤੀਆਂ ਗਈਆਂ ਸਨ ਅਤੇ ਵੱਧ ਤੋਂ ਵੱਧ 50 ਕਿਲੋਮੀਟਰ ਦੀ ਉਚਾਈ ਤੇ ਇਨ੍ਹਾਂ ਨੇ ਉਡਾਣ ਭਰੀ ਸੀ| ਅਧਿਕਾਰੀ ਮੁਤਾਬਕ ਦੱਖਣੀ ਕੋਰੀਆ ਦੇ ਵਿਸ਼ਲੇਸ਼ਣ ਤੋਂ ਪਤਾ ਚੱਲਿਆ ਹੈ ਕਿ ਦੋਵੇਂ ਮਿਜ਼ਾਈਲਾਂ ਨੂੰ ਮੋਬਾਈਲ ਲਾਂਚਰ ਨਾਲ ਦਾਗਿਆ ਗਿਆ| ਉੱਧਰ ਜਾਪਾਨ ਦਾ ਕਹਿਣਾ ਹੈ ਕਿ ਇਨ੍ਹਾਂ ਮਿਜ਼ਾਈਲਾਂ ਨਾਲ ਉਸ ਦੇ ਸਮੁੰਦਰੀ ਖੇਤਰ ਵਿੱਚ ਕੋਈ ਅਸਰ ਨਹੀਂ ਹੋਇਆ|